Daha bir bankda səhmdarların pay bölgüsü dəyişib
Bu, Bankın nizamnamə kapitalının 1,2 mln. manat və yaxud 11,74% artırılaraq 102,2 mln. manatdan 103,4 mln. manata çatdırılmasından sonra baş verib. Qeyd edək ki, böyük zərərlər ilə bağlı olaraq Bankın məcmu kapitalı 50 milyon mantdan da aşağıdır.
Belə ki, "AGBank”ın kapital artımı üçün dövriyyəyə buraxdığı, hər birinin nominal dəyəri 2 manat olan 600 min ədəd yeni səhmi Bankın əsas sahibi və Müşahidə Şurasının (MŞ) sədri olan Çingiz Əsədullayev əldə edib. Son nəticədə onun “AGBank”dakı payı 33,57%-dən 34,34%-ə yüksəlib.
Əvəzində digər səhmdarların Bankdakı payı azalıb. Belə ki, Beynəlxalq Maliyyə Korporasiyasının (IFC) payı 4,28%-dən 4,23%-ə, “Kazimir Partners” şirkətinin payı 2,45%-dən 2,42%-ə, Fərzulla Yusufovun (MŞ-nın üzvü) payı 5,79%-dən 5,72%-ə, Marçenko Qriqoriyin (Qazaxıstan Mərkəzi Bankının keçmiş sədri, MŞ-nın üzvü) payı 8,3%-dən 8,2%-ə, 78 minoritar səhmdarın payı isə 45,61%-dən 45,08%-ə düşüb.
Xatırladaq ki, "AGBank" 1992-ci ildə "Azəriqazbank" adı ilə fəaliyyətə başlayıb, 2012-ci ildə rebrendinq edib.
SƏHMLƏRİNİ ALAN OLMAYIB
Xəbər verdiyimiz kimi, “AGBank” ASC nizamnamə kapitalını 7 mln. manat artırmaq üçün satışa çıxardığı yeni səhmlərin 82,86%-ni sata bilməyib.
Bu barədə Bakı Fond Birjasına istinadən xəbər verlir.
Xatırladaq ki, Bank kapital artımı üçün dövriyyəyə hər birinin nominal dəyəri 2 manat olan 3,5 mln. ədəd yeni səhm buraxıb. Səhmlərə abunə yazılışı bu il fevralın 26-dan mayın 26-na qədər “Unicapital İnvestisiya Şirkəti” ASC-nin vasitəçiliyi ilə həyata keçirilib.
Prosesin yekunlaşmasından keçən təxminən 1 ay ərzində yeni səhmlərin 600 min ədədi (1,2 mln. manatlıq hissəsi) və yaxud 17,14%-i alınıb. Son nəticədə “AGBank” nizamnamə kapitalını istədiyi kimi 6,85% yox, cəmi 1,17% artıra bilib və 102,2 mln. manatdan 103,4 mln. manata çatdırıb.
Report
Digər xəbərlər
