31.03.2021 Bank

0 0

Bunu “Report”a eksklüziv müsahibəsində Dünya Bankının Azərbaycan üzrə ölkə meneceri Sara Maykl (Sarah Michael) deyib.

S.Mayklın sözlərinə görə, DB mayda Azərbaycanla yeni kredit sazişi imzalamağa hazırlaşır:

“Hazırda bizim yeni layihələrlə bağlı bəzi ideyalarımız var. Yeni layihələrdən biri regional bağlantıların qurulması ilə bağlıdır. Hansı ki, nəqliyyat və lokal iqtisadi inkişaf layihəsidir ki, onun da hazırlıqlarını yekunlaşdırmaq üzrəyik. Dünya Bankı olaraq ümid edirik ki, bu ilin mayında Azərbaycan hökuməti ilə yeni saziş imzalaya biləcəyik.

Belə bir layihəyə başlamaqda çox məmnunuq. Düşünürük ki, layihə nəqliyyat bağlantıları ilə bağlı geridə qalan regionlara müsbət təsir edəcək. Eyni zamanda biz yerli iqtisadiyyatların inkişafını da dəstəkləyəcəyik. Hansı ki, qadın sahibkarlığı əsas olmaqla kiçik sahibkarlığın inkişafı da daxildir.

Biz bununla çox məmnunuq və digər yeni layihələrin reallaşdırılması üçün hökumətlə danışıqlara başladıq”.

Qeyd edək ki, Dünya Bankı Direktorlar Şurası mayın 25-də Azərbaycanda “Regional bağlantılarının inkişafı” adlı yeni yol layihəsi üçün 65 milyon ABŞ dolları məbləğində kreditin ayrılmasını təsdiq edəcək. Ümumi dəyəri 95,8 milyon ABŞ dolları olan layihənin məqsədi Salyan-Biləsuvar yolu boyu təhlükəsiz, səmərəli, iqlim dəyişkənliyinə qarşı dayanıqlı hərəkəti təmin etməkdir.

Layihə dörd komponentdən ibarətdir. “Nəqliyyat hərəkəti” adlı birinci komponentin dəyəri 59,24 milyon ABŞ dollarıdır, əsas alt komponent (55,63 milyon ABŞ dolları) adıçəkilən yolun 31,9-103,3 kilometrləri arasında bəzi hissələrinin ikinci dərəcə səviyyəsində bərpasını nəzərdə tutur.

2 milyon ABŞ dolları dəyərində “Yol sektorunun dayanıqlılığı” adlı ikinci komponent intellektual nəqliyyat sistemlərinin tətbiqilə yol idarəçiliyinin təkmilləşdirilməsini, yoldan istifadə etmə haqqının elektron formatda ödənişi üçün müvafiq infrastrukturun qurulmasına texniki yardım göstərilməsini nəzərdə tutur.

“Yerli inkişaf və logistika” adlı üçüncü komponentin başlıca tərkib hissəsi yolboyu logistika və bazar obyektlərinin inkişaf etdirilməsini, bunun üçün kiçik sərmayələr yatırılması üçün pilot layihələrinin tətbiqini əhatə edir.

Dördüncü komponent də layihənin idarəetmə məsələlərini əhatə edir.

Xatırladaq ki, Azərbaycan 1992-ci ildən Dünya Bankı ilə əməkdaşlıq edir. Bu dövr ərzində Bank Azərbaycanın reallaşdırdığı 50-dən artıq layihəyə 4 mlrd ABŞ dolları civarında vəsait ayırırb.