06.09.2018 Bank

0 0

Artıq paytaxt yollarında avtomobillərin sıxlığı müşahidə edilir. Bu isə istər-istəməz yol-nəqliyyat hadisələrinin sayının artmasını qaçılmaz edir.

Bəs görəsən gün ərzində neçə sığorta hadisəsi baş verir?

Sığorta mütəxəssisi Xəyal Məmmədxanlı məsələ ilə bağlı redaksiyamıza açıqlamasında bildirib ki, sığorta bazarında gün ərzində icbari sığortalar üzrə baş vermiş hadisələr də daxil olmaqla, 100-ə yaxın yol hadisəsi baş verir:

"Əslində baş vermiş həmin hadisələrin hamısı sığorta hadisələridir. Çünki həmin avtomobillərdən heç olmasa 1-2-nin icbari sığortası var. Bəzi şirkətlərdə gün ərzində 5-6, bəzilərində isə 20-25 hadisə baş verir. Məsələn, "KASKO BUTİK"də gün ərzində bəzən 5-6 hadisə olur. Elə günlər olur ki, heç bir hadisə olmur. Avtomobillə bağlı baş verən sığorta hadisələrinin böyük əksəriyyətini icbari sığortalarla əlaqəli hadisələr təşkil edir. İcbari sığortaların içərisində portfellərinə görə, ən çox hadisəsi olanlar "Atəşgah" Sığorta, "AtaSığorta" və "Paşa Sığorta"dır. Həmin şirkətlərdə icbari sığortalıların sayı həddindən artıq çox olduğuna görə təbii ki, hadisələrin sayı da ona nisbətən artır".

Ekspert eyni zamanda vurğulayıb ki, yol şəraiti qəzaların statistikasına birbaşa təsir göstərir:

"Apardığımız araşdırmalar onu göstərir ki, avtomobil qəzalarının sayının havanın temperaturu ilə heç bir əlaqəsi yoxdur. Bakıda adətən avtomobil sığortası hadisələrinin sayı əsasən qarlı, yağışlı günlərdə daha çox olur (hər il artır). Sürücülərin əksəriyyəti avtomobili hava şəraitinə uyğun idarə etmir. 99%-i qış təkərləri istifadə etmir. Ən çox qəzalar Bakı-Lənkəran istiqamətində baş verir. Səbəb yol şəraiti ilə bağlıdır. Yolun işıqlandırılmaması, yolun vəziyyətinin qənaətbəxş olmaması, sürət rejiminə uyğun olmaması və s. Hazırda ən az qəza Bakı-Qəbələ istiqamətindədir (radarlar, yolun keyfiyyəti və s.). Yeganə sevindirici hal ondan ibarətdir ki, avtomobillərdə olan texnoloji yeniliklərlə, şəhərdə nəqliyyatın tənzimlənməsi ilə bağlı aparılan tədbirlər ölümlə nəticələnən hadisələrin sayını azaldıb".