Qubaya 3200 manata tur

Qubaya 3200 manata tur - Kasıblar üçün deyil

Azərbaycanda 3200 manata tur təklif olunur. Təklif olunan məbləği ödəməklə insanlar Quba rayonunda beş gün istirahət edə bilərlər. Qubada bu qiymətə istirahət təklifi isə sosial şəbəkədə təbii olaraq təəccüb doğurub. Hətta buna etiraz edənlər də var.

"Kommersant.az" xəbər verir ki, Oxu.Az-ın əməkdaşı fantastik məbləğə istirahət təklifinə nələrin daxil olduğunu aydınlaşdırmaq üçün turizm şirkəti ilə əlaqə saxlayıb.

Məlum olub ki, tura - "Hummer H2" (limuzin), gündə altı dəfə qidalanma, beş ulduzlu hoteldə gecələmə (VIP), qolf oyunu, tennis və futbol meydançalarından istifadə, SPA (cakuzi, hovuz, sauna, masaj), boulinq və atıcılıq daxildir.

Şirkətin sədri Kamal Aken saytımıza açıqlamasında bildirib ki, 3200 manatlıq tur üç nəfər üçün nəzərdə tutulub:

"Biz vətəndaşı Qubaya "Hummer H2"də aparırıq. Bu maşınla beş günlük transfer 2000 manat edir. Sizcə, bu, normal deyil? Bizim Qubaya 15-20 manatlıq turlarımız da var. Bu tur isə VİP turdur və aşağıbüdcəli insanlar üçün deyil.

Bu turun konkret müddəti yoxdur. Kim nə zaman getmək istəyirsə, bir həftə öncədən bizə məlumat verir və biz turu təşkil edirik".

Kamal Aken bildirib ki, tur-paketlə maraqlanan insanlar az deyil:

"Biz tur barədə məlumatı yaymışıq. İnsanlar zəng edir, soruşurlar. Artıq bu gün iki nəfər tur-paket almaq üçün yaxınlaşacağını bildirib".

Oxu: Azərbaycan "Avroliqa"dan 50 milyon dollar gəlir götürə bilər
Turizm Assosiasiyasının (AzTA) rəhbəri Nahid Bağırov bildirib ki, təklif edilən turun qiyməti 10 min manat da ola bilər:

"Bütün bunlar təklif olunan tur-paketdən asılıdır. Hər bir müştəri üçün özəl otaq var. Nəzərə alsaq ki, paketdə beş ulduzlu hotel təklif edib və beş gün üç nəfərin orada qalması təxminən 2500 manat təşkil edir.

İnsanlar istəyir, alsın, istəmir, almasın. Şirkət təklif edir, seçim insanlarındır. Məcburi heç nə yoxdur. Xaricdə daha baha qiymətə turlar təşkil edilir. Xaricdə 20-30 min manatlıq turlar var. Qiymət tura nəyin daxil olmasından asılıdır".

AzTA sədri qeyd edib ki, insanların istirahəti üçün daha çox şərait yaradılmalıdır:

"Hazırda regionlarda münasib qiymətə tur-paketlər təklif olunur. Eyni zamanda, kəndlərdə evlər də kirayə verilir. Seçim çoxdur və bütün təbəqədən olan insanların istirahət etməsi üçün turlar təklif edilməlidir".

Turizm üzrə ekspert Kənan Hənifəyev bildirib ki, təklif olunan qiymət realdır:

"Göstərildiyi kimi, VİP xidmətdir. Bu xidmət turizm sektorunda "VİP luxury" adlanır. Adamlar var, İstanbula tura gedirlər, 8-10 min dollar arası ödəniş edirlər".

turizm