"Starbucks" Çindəki 2000 şöbəsini bağladı

Dünyaca məşhur "Starbucks" qəhvə şirkəti koronavirus epidemiyası səbəbindən Çində fəaliyyət göstərən 2000 şöbəsini bağlayıb.

"Kommersant.az" xarici mətbuata istinadən xəbər verir ki, şirkət işçilərini qorumaq və hökumətin epidemiyanı nəzarət almasına dəstək olmaq üçün bu addımı atıb. "Starbucks"ın baş direktoru Kevin Conson şirkətin çox dinamik mərhələdən keçdiyini deyib. Bildirib ki, "Starbucks" birinci rübdə gözləniləndən daha yaxşı performans nümayiş etdirdiyindən illik mənfəət proqnozlarını yenidən nəzərdən keçirməyi düşünürdülər. Lakin virus səbəbindən bu qərardan imtina edilib.

Çində 4300-ə yaxın şöbəsi fəaliyyət göstərən məşhur qəhvə şirkəti getdikcə genişlənən epidemiyanın maliyyə performansına təsir göstərəcəyi ilə bağlı xəbərdarlıq edib. Çin "Starbucks"ın ABŞ-dan kənardakı ən böyük satış bazarıdır. Belə ki, şirkətin qlobal satışlarının 10 faizi buranın payına düşür. Bu səbəbdən də Çin bazarı "Starbucks"ın böyümə hədəflərinin lokomativi hesab edilir.

Qeyd edək ki, şirkət burada ilk şöbəsini 1999-cu ildə açıb.

Xatırladaq ki, hazırda koronavirusdan ölənlərin sayı 132-yə çatıb, epidemiyaya yoluxanların sayı isə 6000-ə yaxınlaşır.