İşlənmiş yağlar təkrar emal edilib satışa çıxarılacaq

Babək rayonunun Araz kəndində tullantı yağlarının yenidən emalı, bərk sürtkü yağlarının istehsalı sahəsi və quşçuluq təsərrüfatı yaradılır.

Bərk sürtkü yağları istehsal olunacaq müəssisədə hazırda xaricdən gətirilən dəzgahların qurulması prosesi başa çatmaq üzrədir. İstifadə müddətini başa vurmuş yağlar burada təkrar emal olunaraq bazara çıxarılacaq. İstehsal ediləcək məhsulların daxili bazarla yanaşı, qardaş Türkiyə Respublikasında da satışı nəzərdə tutulur. Burada yeni iş yerləri yaradılacaq və gələcəkdə müəssisəsinin ixrac imkanları genişləndiriləcəkdir.

Həmin ərazidə sahibkar Zəka Mirzəyevə məxsus yeni quşçuluq təsərrüfatı da fəaliyyətə başlayacaq. 800 kvadratmetr ərazini əhatə edən istehsal sahəsinə 20 min quş gətiriləcək. Burada dərman və dən deposu, eləcə də işçilər üçün otaqlar ayrılıb. Müəssisədə işıq, su və havalandırma sistemlərinin çəkilişi başa çatdırılıb. Yeni istehsal sahəsi daxili tələbatı ödəmək və xaricə valyuta axınının qarşısını almaq məqsədilə yaradılıb. Gələcəkdə müasir texnologiyaların imkanlarından da istifadə edilməklə məhsul istehsalına başlanılacaq.