"Qara maskalıların hansı məmuru "dincəlməyə" aparmasını istərdiniz?"

"Qara maskalıların hansı məmuru "dincəlməyə" aparmasını istərdiniz?" - Aslan İsmayılov

Bu gün Azərbaycanda sıravi vətəndaşlar tərəfindən ən çox arzulanan qonaq qara maskalı DTX əməkdaşlarıdır. Nə qədər ağlamalı, təzadlı olsa da bu qonaqları xalqa sevdirən elə həmin qara maskalıların “dincəlməyə”, “yüngülləşdirməyə“ apardıqları məmurlardır.

Dünən "hesab edirəm ki, bu çıxışında Prezident Baş Prokuror Kamran Əliyevə qəti davranmaq üçün bütün səlahiyyətləri verdi və arxasında duracağını hamıya bəyan elədi. Həbslərin tək bölgə icra hakimiyyətlərində deyil, həmçinin mərkəzi icra orqanlarında olacağının anonsu verildi" yazmışdım.

Bu gün isə YAP İcra katibinin müavini, Milli Məclisin Regional məsələlər komitəsinin sədri, deputat Siyavuş Novruzov bildirib ki, "Nazirlər, komitə sədrləri ilə bağlı məsələlər də araşdırılır. Araşdırmadan sonra kimliyindən asılı olmayaraq, müvafiq addımlar atılacaq".

Əminəm ki, Prezidentin dünənki çıxışından və YAP-ın ruporu olan S.Novruzovun bu günkü bəyanatından illərdir ölkəni talayan, başçılıq etdikləri nazirliyi, komitəni öz obyekti sayan nazirlər, komitə sədrlərinin yuxuları ərşə çəkilib.

İzləyicilərdən xahiş edirəm, şərhlərdə qeyd edəsiniz - qara maskalıların hansı məmuru "dincəlməyə" aparmasını istərdiniz. Şərhlərinizdə məmurların konkret qanunsuzluqlarını faktlarla göstərsəniz daha faydalı olardı.

Rəsmi qurumlardan isə şərhlərə diqqət yetirmələrini, qeyd olunan faktları incələmələrini və müvafiq addımlar atmalarını xahiş edirəm. Vəzifə borcunuzu yerinə yetirib illərdir vətəndaşların pozulmuş hüquqlarını bərpa edin. Sonra gec olacaq.

Aslan İsmayılov

Hüquqşünas

icra hakimiyyəti icra başçısı aslan ismayılov dövlət təhlükəsizlik xidməti