"Qeyri-ərzaq mağazaları ciddi karantin qaydalarının tətbiqi ilə açılmalıdır"

"Qeyri-ərzaq mağazaları ciddi karantin qaydalarının tətbiqi ilə açılmalıdır" - Fəzail Ağamalı

“İlk olaraq, indiki çətin vaxtda dövlətin əlavə yüklənməsinin tərəfdarı deyiləm”.

"Kommersant.az"-ın məlumatına görə, bunu Milli Məclisin bu gün keçirilən iclasında "Azərbaycan Respublikasının 2020-ci il dövlət büdcəsi haqqında" Azərbaycan Respublikasının Qanununda dəyişiklik edilməsi barədə qanun layihəsinin müzakirəsi zamanı deputat Fəzail Ağamalı deyib.

O bildirib ki, bu bəladan daha az iqtisadi və maliyyə itkisi ilə çıxmalıyıq: "SMS qaydasının ləğv edilməsi ilə insanların küçələr axışdığını müşahidə edirik. Əgər biz insanların küçələrdə, meydanlarda kütləvi şəkildə gəzintisini görürüksə, niyə ayrı-ayrı müəssisələrdə iş bərpa olunmasın? Marketlərdə insanların sayı daha çoxdur, nəinki mebel mağazalarında. Hansısa əşyanı almaq üçün qeyri-ərzaq mağazalarına gedən insanların sayı marketə gedənlərdən azdır. Ayrı-ayrı qeyri-ərzaq mağazaları ciddi karantin qaydalarının tətbiqi ilə açılmalıdır. Karantin rejimi qaydalarına vətəndaşların riayət etməsini tələb etməklə, insanların işləməsinə şərait yaratmalıyıq. "Sədərək" Ticarət Mərkəzindən, "Mall"lardan, digər ticarət mərkəzlərindən insanlar evinə çörək aparır. Niyə bu müəssisələr bağlı qalıb?"

Deputat bildirib ki, Azərbaycanda testin qiyməti də kifayət qədər bahadır: "Bu məsələyə də ciddi şəkildə baxılmalı, testin qiyməti minimuma endirilməli, mümkün olsa, pulsuz olmalıdır".