22.06.2018 İqtisadiyyat

0 0

Buna qədər Berlində, Praqada, Parisdə, Stokqolmda, Londonda və digər böyük Avropa şəhərlərində "beynəlxalq kriptovalyuta-bkokçeyn" konfransları təşkil edən "Smile-Expo" özünün növbəti tədbirini iyunun 20-də Gürcüstanın paytaxtı Tiflisdə keçirib. Bu tədbirdə də kritovalyuta sahəsində ixtisaslaşmış şirkətlər, sahənin məşhur ekspertləri iştirak ediblər. Konfransda kriptovalyuta və blokçeyn texnologiyasının inkişafı istiqamətində Gürcüstanın əldə etdiyi nəticələrə diqqət yetirilməklə yanaşı, kriptovalyuta bazarına qədəm basmağa hazır olan yeni məhsulların təqdimatına da xüsusi diqqət yönəldilib. Bununla yanaşı, blokçeyn texnologiyasının dövlət idarəçiliyində tətbiqi və kriptovalyutaların dövriyyəsini tənzimləyəcək hüquqi bazanın formalaşdırılması kimi mövzular ətrafında geniş müzakirələr aparılıb.

Diqqətçəkən məqamlardan biri odur ki, Tiflis konfransının əsas iştirakçıları sırasında Azərbaycanın milli kriptovalyuta layihəsi olan "Azkoin"in(Azcoin) də yer alacağı nəzərdə tutulubmuş. Hətta "Azkoin"nin tədbirin sponsorlarından biri olacağı da gözlənilirmiş. Lakin konfransa bir neçə gün qalmış "Azkoin" komandası nəinki sponsor olmaqdan, hətta iştirakçılıqdan da imtina edib.

Bunun səbəbləri barədə mətbuata açıqlama verən "Azkoin" - milli kriptovalyuta layihəsinin rəhbəri Adəm Allahverdiyev bildirib ki, imtina qərarı bilavasitə milli maraqlardan irəli gəlib:

"Azkoin" layihəsinin təmsilçiləri bu kimi mötəbər tədbirlərə qatılmaqda maraqlıdırlar. Buna qədər biz bir neçə beynəlxalq konfransda iştirak edərək həm "Azkoin"i təqdim etmişik, həm də ölkəmizdə innovasiyaların tətbiqinə yaradılan şəraitdən, yeni texnologiyaların ayrı-ayrı sahələrə yönəldilməsi xüsusunda görülən işlərdən və təbii ki, yeni dövrün əsas çağırışlarından olan kriptovalyuta-blokçeyn texnologiyasının inkişaf etdirilməsi məqəsədilə atılan addımlardan danışmışıq. Biz sevinirik ki, blokçeyn texnologiyası və kriptovalyutalara dair keçirilən beynəlxalq konfransların iştirakçıları sırasında "Azkoin" də var. Çalışırıq ki, ölkəmizi layiqincə təmsil edək və göstərək ki, biz bütün digər sahələrdə olduğu kimi, kriptovalyuta-blokçeyn texnologiyasının tədbiqi sahəsində də birincilərdən olmaq həvəsində və gücündəyik. O ki, qaldı Tiflis konfransında iştirakçılıqdan imtina etməyimizə, bəli, biz bu tədbirdə geniş heyətlə qatılmaq niyyətindəydik. Hətta sırf Azərbaycanın adına görə konfransın sponsorlarından biri olmağa da hazır idik. Bunun üçün kommunikasiya qurulmuşdu, təşkilatçı şirkətlə detalları aydınlaşdırmağa da başlamışdıq. Onu da deyim ki, biz Tiflis konfransına baş sponsor olaraq da qatıla bilərdik. "Azkoin"nin məqsədi həm də odur ki, Azərbaycan kriptovalyuta və blokçeyn texnologiyası sahəsində regionun əsas ölkələrindən biri kimi qəbul olunsun. Odur ki, böyük konfransların təşkilində yaxından iştirak etmək əzmindəyik və Tiflis konfransına da eyni həvəs bə eyni məqsədlə qatılmaq niyyətindəyidik. Lakin son anda məlum oldu ki, təşkilatçı şirkət baş sponsorluğu "Bixtrim"in yaradıcısı, milliyətçə erməni Artur Arabyana verib. Hətta konfransda salamlama çıxışı da ona həvalə olunub. Təbii ki, biz bununla razılaşa bilməzdik. Odur ki, məsələyə sırf milli maraqlardan yanaşaraq erməninin baş sponsor olduğu konfransda iştirakdan imtina etdik".

A.Allahverdiyev sentyabrın 27-də Bakıda keçiriləcək beynəlxalq konfransa hazırlaşdıqlarını da qeyd edib. "Azkoin" layihəsinin rəhbəri bildirib ki, ilk dəfə olaraq Bakıda beynəlxalq kiriptovalyuta – blokçeyn konfransı keçiriləcək: "Konfransı ənənəvi olaraq "Smile-Expo" şirkəti təşkil edəcək. Təbii ki, "Azkoin" layihəsi olaraq biz də bu konfransda yaxından iştirak edəcəyik. Çox böyük ümidimiz var ki, kriptovalyutla və blokçeyn səhəsində ölkəmizdə böyük irəliləyişlər əldə olunacaq".

Azərfaks