"ABŞ-ın LNG bazarındakı payı 5 ildə 5 dəfə artacaq"

Beynəlxalq Enerji Agentliyinin (IEA) rəhbəri Doktor Fatih Birol, ABŞ-ın qaz istehsalı və mayeləşdirilmiş qaz ixracının (LNG) çox sürətli şəkildə artdığını qeyd edərək, "Proqnozlarımıza görə, gələcək 5 ildə qlobal LNG ixracatındakı artımın 75%-ini ABŞ təmin edəcək. ABŞ-ın qlobal LNG bazarındakı payı, bu artımla 4%-dən 20%-ə yüksələcək. Bunun ticarət, qiymətlər, enerji təhlükəsizliyi və geosiyasi baxımından əhəmiyyətli nəticələri olacaq", - deyib.

"Kommersant" xəbər verir ki, Birol, Vaşinqtonda keçirilən Dünya Qaz Konfransında, IEA-nın qlobal qaz bazarını qiymətləndirən illik hesabatına dair mətbuat konfransı keçirib.

Qlobal qaz bazarını gələcək illərdə 3 mühüm amilin formalaşdıracağını bildirən Birol, bunları Çinin dünyanın ən böyük qaz idxalçısı halına gəlməsi, ABŞ-ın qaz hasilatı və LNG ixracatındakı sürətli artım və emal sektorunun qaz tələbində birinci yerə keçməsi olaraq sıralayıb.

Qlobal qaz istehlakının 2023-cü ilə qədər xüsusilə Çindən gələn tələbin təsirilə illik orta hesabla 1,6 faiz artacağına işarə edən Birol, "Çinin qaz istehlakı gələcək 5 ildə qlobal tələbin 40%-ni yaradacaq. Bu ümumiyyətlə Çin hökumətinin mavi səma siyasətindən qaynaqlanır",- deyib.

ABŞ-ın qaz hasilatı və LNG ixracının da son illərdə çox sürətlə artdığını dilə gətirən Birol, qlobal qaz istehsalındakı mövcud artımın yarısına yaxınının ABŞ-dan qaynaqlandığını vurğulayıb.

Qaza olan tələbat təxminən 10 ildir ki, lider mövqeyində olan elektrik enerjisi istehsalı sektorunun yerini emal sektoruna verəcəyinə diqqəti çəkən Birol, gələcək 5 ildə qaz istehlakında artımın 40%-nin emal sektorundan yaranacağı məlumatını verib.

ABŞ, Çin, Avropa Birliyi və Kanada arasındakı ticari gərginlikləri ilə bağlı suallarıcavablandıran Birol, "Mənim gözləntim ticarət sahəsindəki münaqişələrin LNG ixracına əhəmiyyətli dərəcədə təsir etməyəcəyi istiqamətindədir" deyib.

Birol, digər tərəfdən, qaz şirkətlərinin diqqət etməsi lazım olan iki mühüm amilin qiymət və metan qazının salınması olduğunu bildirib.

Qaz qiymətlərinin bir dəyər yüksəlməsinin bazar payının düşməsinə səbəb ola biləcəyini qeyd edən Birol, xüsusilə inkişaf edən ölkələrin digər enerji mənbələrinə yönəlməsinin mümkün olduğunu qeyd edib.

Həmçinin Birol, qaz hasilatına görə ildə 76 milyon ton metan qazının atmosferə qarışdığına diqqəti çəkərək, bu miqdarın yarısının heç bir yeni texnologiyaya ehtiyac olmadan qarşısının alınmasının mümkün olduğunu sözlərinə əlavə edib.