G7 liderlərindən ərzaq təhlükəsizliyi böhranı mesajı

G7 liderləri dünyada aclıq riskini və pisləşən qlobal ərzaq təhlükəsizliyi böhranını həll etmək üçün birgə işləməyin vacibliyini vurğuladı.

Kommersant.az xəbər verir ki, Yaponiyanın Xirosima şəhərində keçirilən G7 Liderlərinin Sammiti davam edir. G7 liderləri sammit çərçivəsində “Qlobal Qida Təhlükəsizliyi Qlobal Müqavimət üzrə Fəaliyyət Bəyannaməsi”ni açıqlayıblar.

COVID-19, Rusiya-Ukrayna müharibəsi, dəyişən enerji və gübrə qiymətlərinin qlobal ərzaq təhlükəsizliyini təhdid etdiyi qeyd edilən açıqlamada, 2021-ci ildə dünyada 828 milyona yaxın insanın aclıqla üzləşdiyi bildirilib.

Qıtlıq riskinə diqqət çəkən açıqlamada, getdikcə pisləşən qlobal qida təhlükəsizliyi böhranına qarşı birgə çalışmağın vacibliyi qeyd edilib.

Bəyanatda tərəflər Qara Dəniz Taxıl Təşəbbüsünün maksimum potensialında düzgün işləməsini təmin etməyə çağırılıb.

Əlverişli, təhlükəsiz və qidalı qidaya çıxışın əsas ehtiyac olduğunu vurğulayan bəyannamədə bazarlarda proqnozlaşdırıla bilənliyi artıraraq davamlı sistemlərin yaradılmasının vacibliyi vurğulanıb.

“Hər bir insan üçün daha yaxşı gələcək qurmaq, xüsusilə də hamı üçün davamlı qlobal ərzaq təhlükəsizliyini və qidalanmanı təmin etmək bizim ortaq məqsədimizdir”, - deyə bəyanatda bildirilir.