"Yeni üsulla hektardan 50 tondan çox yerkökü götürürük"

Bərdə rayonunda torpaq mülkiyyətçilərinin becərdikləri əsas kənd təsərrüfatı bitkilərindən biri yerköküdür. Hələ keçmiş Sovet dövründə Bərdə rayonu pambıqçılıq, taxılçılıqla yanaşı yerkökünün də istehsal edildiyi rayon kimi tanınıb. Rayonun Soğanverdilər kəndi isə respublikamızda yerkökü istehsalı ilə məşhurdur. Kənd sakinlərinin istehsal etdikləri məhsul ölkənin bütün regionlarında, o cümlədən Bakı şəhərində satışa çıxarılır.

"Kommersant" Azərtac-a istinadən bildirir ki, yerkökü istehsalçıları bir neçə ildir ki, müasir becərmə texnologiyalarının tətbiqinə başlayıblar. Damcı suvarma üsulundan, daha məhsuldar toxumlardan istifadə edərək 4 hektarda yerkökü becərən kənd sakini Rafiq Ələsgərov artıq becərdiyi məhsulun yığımını həyata keçirir.

Rafiq Ələsgərov yeni texnologiya ilə becərmənin üstünlüklərindən danışıb.

Bildirib ki, müasir becərmə texnologiyalarından, damcı suvarma üsulundan, daha məhsuldar toxumlardan istifadə etməklə yüksək məhsuldarlığa nail olmaq mümkündür:

"Müasir üsulla əkilən yerkökü sahələrini becərmək əvvəlkinə nisbətdə daha çox vəsait tələb etsə də, məhsuldarlıq yüksək olur. Yerkökü toxumu yeni üsulla mart ayından başlayaraq əkilir. Bitkinin suvarılması damcı sistemi ilə həyata keçirilir. Damcı üsulu ilə suvarma zamanı suya qənaət edilir, su bitkilər arasında bərabər paylanır, torpaq qaysaqlamır, yumşaq qalır, alaq otları azalır. Zərərvericilərə qarşı mübarizə də daha effektli və asan olur. Yerkökünün görünüşü və sağlamlığı daha yaxşı olur, məhsuldarlıq yüksəlir. Əgər ənənəvi yolla becərmə zamanı məhsuldarlıq hər hektardan 15-20 ton olurdusa, yeni üsulla becərmə zamanı hektardan 50 tondan çox yerkökü götürülür. Əvvəllər yerkökü ancaq bir mövsümdə becərilir, məhsul noyabr-dekabr aylarında yığılırdı. İndi isə ilin istənilən mövsümündə yerkökü becərmək mümkündür".

Əkinçilikdə növbəli əkin sistemini tətbiq edən fermer yerkökü ilə yanaşı şəkər çuğunduru, taxıl, pambıq da becərir. "Yerkökünün növbəlilik əsasında, mərhələlərlə və müxtəlif yetişmə tezliyinə malik sortların əkilməsi nəticəsində ilboyu məhsulumuz olur. Belə becərmə çox əlverişlidir. Məhsulumuza tələbat həmişə var. Hazırda yerkökünün bir kiloqramı 55-60 qəpiyə satılır. İstehsal etdiyimiz məhsul Bakının bazarlarına çıxarılır. Artıq məhsulumuz Rusiya bazarlarına da göndərilir", - deyə fermer bildirib.

Dünyanın qabaqcıl becərmə texnologiyaları ilə daim maraqlanan bərdəli fermer növbəti mövsümdə yerkökünü daha mütərəqqi üsulla becərəcəyini deyir. Əsas məqsədi isə intensiv becərmə yolu ilə daha yüksək məhsuldarlığa nail olmaqdır.