İngiltərədən Türkiyədəki şəxslərə və qurumlara sanksiya

Böyük Britaniya Rusiyanın idxal etdiyi hərbi texnikaya çıxışını kəsmək və Rusiya müdafiə sistemlərini zəiflətmək məqsədilə tətbiq etdiyi sanksiyalar çərçivəsində İran, Türkiyə, Dubay, Slovakiya və İsveçrədəki bəzi şəxslərə və qurumlara qarşı yeni sanksiyalar tətbiq edib.

İngiltərə Rusiya-Ukrayna müharibəsində Moskva administrasiyasına 'hərbi texnika dəstəyi verdiyi' bildirilən şəxslərə və qurumlara sanksiya tətbiq edib. Sanksiyaya məruz qalanlar arasında Türkiyədən olan adların da olduğu bildirilib. Siyahıda Türkiyədən başqa İran, Dubay, Slovakiya və İsveçrədən də adlar var.

Böyük Britaniyanın xarici işlər naziri Ceyms Kleverli bildirib ki, bu gün elan edilən mühüm sanksiyalarla Rusiyanın arsenalı daha da azalacaq və Putinin hazırda mübarizə aparan müdafiə sənayesini dəstəkləyən təchizat zəncirləri şəbəkəsi bağlanacaq.

Britaniya hökuməti Ukraynadakı müharibədə Rusiyaya dəstək verdiyini iddia etdiyi Rusiyadan kənar şəxslərə və şirkətlərə, eləcə də Rusiyanın döyüş meydanında istifadə etdiyi hərbi texnikada elektron cihazlar idxal edən 3 rus şirkətinə qarşı 22 yeni sanksiya tətbiq edib.