Dənizkənarı Milli Parkda

Dənizkənarı Milli Parkda - VİDEO-TUR

Burada zaman sanki dayanır, rəngli düşüncələr ruha hakim kəsilir.

"Kommersant" xəbər verir ki, bir vaxtlar Bakının "almaz boyunbağı" adlandırılan Dənizkənarı Milli Park xüsusilə axşam saatlarında daha əsrarəngiz görünür.

Burada sanki zaman dayanır, rəngli düşüncələr ruha hakim kəsilir. Nura qərq olan gecə görünüşləri insanı romantik mənzərənin əsirinə çevirir.

Saat 21:00-ı göstərir. İşgüzar həyatdan yorulan, dəniz havası almaq istəyən, dərdini dəniz ləpələrinə tökmək istəyən hər kəs - gənc, yaşlı yolunu buradan salır. Uşaqlar isə dondurma yeməklə sanki istiyə meydan oxumağa çalışırlar.

Gitara ilə musiqi ifa edən gənclər isə diqqəti cəlb etməyi bacarmışdı. Canlı musiqidən zövq alanlar yalnız bir kənarda əyləşib dinləyənlər deyildi. Asiyalı turist anı kamerasının yaddaşına köçürürdü.

Sahilində minlərlə eşqin lövbər saldığı Xəzər bu dəfə də gənc sevgililərə qucaq açmışdı. Göy üzündə bərq vuran Ay sanki sevgiyə dəstəyini yerə səpələdiyi nurla göstərməyə çalışırdı.

Saat birə işləsə də, Bakı Dənizkənarı Milli Parkından ayrılmaq olmur. Gecənin nağıl tamaşası başa çatsa da, təəssüratlarımın uzunmüddətli olacağına şübhə etmirəm.