Brent markalı neftin barel qiyməti 84,14 dollardır

Ötən gün 84,35 dollara kimi bahalaşan Brent markalı neftin bir barel qiyməti günü 83,94 dollarla başa vurub. Brent markalı neftin bir barelinin qiyməti 09.02-də bağlanış vaxtı ilə müqayisədə 0,24 faiz artaraq 84,14 dollara çatıb. Eyni zamanda, West Texas Intermediate (WTI) markalı xam neftin bir barreli 80,08 dollara satılıb.

Neftin qiymətinin yüksəlməsinə yay aylarında səyahətlərin artması ilə qlobal tələbatın artacağına dair gözləntilər və dünyanın ən böyük neft istehsalçılarının tədarükləri azaltmağa davam edəcəyi proqnozu səbəb olub.

İyunun 2-də dünyanın ən böyük neft istehsalçıları toplantı keçirəcək. Neft İxrac Edən Ölkələr Təşkilatı (OPEC) və OPEC-ə daxil olmayan bəzi hasilatçı ölkələrdən ibarət OPEC+ qrupu daha əvvəl könüllü olaraq gündəlik hasilatı 2,2 milyon barel azaltmaq qərarına gəlib.

Qrupun bu həftə keçiriləcək iclasda könüllü xam neft tədarükünün kəsilməsini ilin ikinci yarısına qədər uzatmağa qərar verəcəyi gözləntiləri neft qiymətlərinin yüksəlməsinə dəstək verir.

Əsas neft istehsalçılarının və ticarət yollarının yerləşdiyi Yaxın Şərqdə davam edən münaqişələr də neftin qiymətini artırır.

Beynəlxalq Ədalət Məhkəməsinin (ICJ) mayın 24-də Rəfaha hücumları dayandırmaq qərarına və beynəlxalq reaksiyalara baxmayaraq, İsrail Qəzza zolağının cənubundakı Rəfah şəhərinə hücumlarını davam etdirir.