Qızılın qiyməti ilk dəfə olaraq 2600 dolları ötüb

Çikaqo Ticarət Birjasının (CME) məlumatına görə, qızılın qiyməti tarixi rekordunu yeniləyərək unsiya üçün 2600 dollara qədər yüksəlib, Banker.az bu barədə Forbes-ə istinadən xəbər verir.

Dekabr qızıl fyuçerslərinin dəyəri pik nöqtədə 2601 dollara çatıb. Bakı vaxtı ilə saat 14:32-də artım 0.54%-ə qədər yavaşlyıb və qiymətli metalın dəyəri 2594.5 dollara düşüb.

Qızılın qiyməti Federal Ehtiyat Sisteminin (FED) monetar siyasətini yumşaltması, həmçinin Yaxın Şərqdəki münaqişələr səbəbindən təhlükəsiz “sığınacaqlara” güclü tələbat sayəsində təxminən 25% bahalaşıb.

Bundan əlavə, pərakəndə investorlar tərəfindən qızıla maraq artır: 11 sentyabrda gündəlik ticarət həcmi 99 527 müqavilə təşkil edib, halbuki bütün 2020-ci il üçün tarixi maksimum 86 101 lota çatıb, “Bloomberg” qeyd edir.

“Citigroup” analitikləri qızılın qiymətinin il yarım ərzində bir unsiya üçün 3000 dollara çata biləcəyini proqnozlaşdırırlar. Onlar metalın orta qiymətinin 2024-cü ildə 2350 dollar, 2025-ci ildə isə 2875 dollar olacağını gözləyirlər.