15.10.2024 İqtisadiyyat

0 0

İnvestorların Almaniyada iqtisadiyyatla bağlı gözləntilərini ölçən ZEW İqtisadi Meyil İndeksi gözləntiləri aşaraq oktyabr ayında 13,1 səviyyəsində açıqlanıb. Reuters sorğusunda iştirak edən iqtisadçılar indeksin 10-a yüksələcəyini proqnozlaşdırmışdılar. Bu indeks sentyabr ayında 3,6 olaraq açıqlanıb.

ZEW indeksi Almaniyada gələcək altı ay ərzində gözlənilən iqtisadi inkişaflarla bağlı investorların nikbinlik səviyyəsini göstərir. Bu məlumatlar təxminən 350 maliyyə-iqtisadi analitikin iştirakı ilə keçirilən sorğu nəticəsində əldə edilib. İndeks iqtisadiyyatın inkişafına nikbin baxan analitiklərin faizi ilə pessimist olanların faizi arasındakı fərqin hesablanması yolu ilə yaradılır.

İndeksin 0 dəyəri neytral perspektivi, -100 isə bütün analitiklərin iqtisadiyyatın pisləşəcəyini düşündüyünü göstərir. +100 o deməkdir ki, bütün analitiklər iqtisadi canlanma gözləyirlər. Oktyabr ayında açıqlanan 13.1 dəyəri investorların iqtisadiyyata daha optimist olduğunu göstərir.

Almaniya iqtisadiyyatının cari vəziyyəti ilə bağlı ayrıca göstərici -84,5-dən -86,9-a düşüb. İqtisadçılar bu məlumatların -84,5 səviyyəsində qalacağını proqnozlaşdırmışdılar.