Ötən il səyyar vergi yoxlamaları nəticəsində 530 mln. manat əlavə vergi hesablanıb

2024-cü il ərzində 393 səyyar vergi yoxlaması açılmış və 384 səyyar vergi yoxlaması başa çatdırılmışdır ki, bununla əlaqədar hesablanmış əlavə vəsait 530,7 mln. manat təşkil edib.

Bu, Nazirlər Kabinetinin 2024-cü il üzrə hesabatında əksini tapıb.

Hesabatda qeyd edilib ki, ötən il başa çatmış səyyar vergi yoxlamaları zamanı 384 vergi ödəyicisində və ya səyyar vergi yoxlaması ilə əhatə olunanların hər birində vergi qanunvericiliyinin pozulması halları aşkar edilib. Səyyar vergi yoxlamaları nəticəsində ümumilikdə 530,7 mln. manat əlavə vəsait hesablanmışdır ki, bunun da 363,3 mln. manatı və ya 68,5%-i əlavə hesablanmış vergi, 167,4 mln. manatı və ya 31,5%-i isə vergilərin azaldılmasına və digər hüquq pozuntularına görə tətbiq edilmiş maliyyə sanksiyası (faiz və inzibati cərimə ilə birlikdə) təşkil edib.

Səyyar vergi yoxlamaları zamanı ümumilikdə əlavə hesablanmış vəsaitin 420.2 mln. manatı və ya 79%-i növbəti yoxlamalar, 110,5 mln. manatı və ya 21%- isa növbədənkənar yoxlamalar üzrə olub. 2024-cü il ərzində bir yoxlamaya düşən hesablanmış əlavə vəsaitin məbləği əvvəlki ilin müvafiq dövrü ilə müqayisədə 37% artıb.