Neft qiymətləri son 4 ilin ən aşağı səviyyəsinə düşüb

Əksər əmtəə bazarları, o cümlədən metallar, ABŞ və Çin arasında güclənən ticarət müharibəsi xammala olan tələbatla bağlı narahatlıqları doğurduğundan, neftin qiyməti təxminən 3% azalaraq 2021-ci ildən bəri ən zəif həddə düşüb. Goldman Sachs 2026-cı il üçün neft qiymətləri proqnozlarını azaldır.

Beynəlxalq bazarlarda Brent markalı neftin bir barreli 63,20 dollara satılır.

Cümə günü 69,82 dollara qədər bahalaşan Brent markalı neftin bir barel qiyməti günü 65,84 dollarla bağladı. Brent markalı neftin bir barelinin qiyməti bu gün saat 09:32-ə olan bağlanış qiyməti ilə müqayisədə təxminən 3,87 faiz azalaraq 63,20 dollar olub. Eyni zamanda West Texas Intermediate (WTI) markalı xam neftin bir barreli 59,67 dollara alınıb.

ABŞ prezidenti Donald Trampın ticarət tarifləri ilə bağlı sərt ritorikasını təzələməsi və OPEC+ qrupunun may ayında hasilatı artırmağı planlaşdırdığını elan etməsi ilə həftənin ilk ticarət günündə neft qiymətləri kəskin ucuzlaşıb.

Brent markalı neftin bir barelinin qiyməti 3,87 faiz ucuzlaşaraq 63,20 dollar olub ki, bu da son dörd ilin ən aşağı səviyyəsidir.

Dünyanın ən böyük neft idxalçısı olan Çinin Trampın yeni tariflərinə cavab verməsi və Avropa Birliyi kimi digər böyük iqtisadiyyatların da oxşar addımlar atacağını açıqlaması qlobal ticarət müharibəsi narahatlıqlarını yenidən gündəmə gətirib.