Fitch-dən Türkiyəyə xəbərdarlıq: Siyasi qeyri-müəyyənliklər kredit reytinqlərini təhdid edir

Beynəlxalq kredit reytinq agentliyi Fitch Ratings, Türkiyədə artan siyasi qeyri-müəyyənliklərin maliyyə bazarlarında dalğalanmalara səbəb olacağı təqdirdə türk maliyyə qurumlarının, xüsusilə də bankların kredit reytinqlərindəki müsbət tendensiyanın pisləşə biləcəyini vurğulayıb.

Fitch reytinq agentliyi bildirib ki, Türkiyədə artan siyasi qeyri-müəyyənlik, maliyyə bazarlarında təkrar dalğalanmalara və ya siyasət istiqamətinin dəyişməsinə səbəb olarsa, Türkiyənin bəzi maliyyə qurumlarının müsbət reytinq trayektoriyasını poza bilər.

"Fitch" qeyd edib ki, banklar xarici valyuta dəyişkənliyinə və xarici borclara məruz qaldıqları üçün yaxın müddətdə ən çox təsirlənəcək, bank olmayan maliyyə institutları və sığortaçılar isə daha az yaxın müddətli təsirlərə məruz qalacaqlar.

İmamoğlunun həbsi bazarlarda qeyri-sabitliyə səbəb olub

Fitch xatırladıb ki, İstanbul Böyükşəhər Bələdiyyəsinin sədri Əkrəm İmamoğlunun həbsi və ondan sonrakı etirazlar lirənin ucuzlaşması təzyiqi və dövlət istiqrazlarının faizlərinin artması da daxil olmaqla, bazarlarda bir sıra dalğalanmalara səbəb olub: "Türkiyə banklarının reytinqləri 2023-cü il prezident seçkilərindən sonra yaxşılaşıb, lakin bu cür hadisələr davamlı olaraq təkrarlanarsa və ya investor və əmanətçi əhval-ruhiyyəsinə qalıcı təsir göstərərsə, bu sürət cilovlana bilər. Banklar əhəmiyyətli qısamüddətli xarici borclara malikdirlər və investorların əhval-ruhiyyəsi zəifləsə və depozitlərin dollarlaşması artarsa, artan yenidən maliyyələşdirmə riskləri ilə üzləşə bilər".