19.09.2018 İqtisadiyyat

0 0

"Kommersant.az" xəbər verir ki, Çinin Baş naziri Li Keqianq, Çinin ABŞ ilə ticarət müharibəsi gedişatında ixracı daha rəqabətədavamlı hala gətirmək üçün yuanı devalvasiya etməyəcəyini bildirib.

Nəzərə alsaq ki, Azərbaycanın Çinlə olan ticarət dövriyyəsinin 90%-ni idxal təşkil edir, ABŞ-Çin münasibətlərinin gərginləşməsinin Azərbaycan üçün hansı nəticələri ola bilər?

İqtisadçı ekspert Rəşad Həsənov məsələ ilə bağlı redaksiyamıza açıqlamasında qeyd edib ki, Çin valyutasının dəyərsizləşməsi və ölkədə istehsal olunan malların maya dəyərinin aşağı düşməsi fonunda, Azərbaycana idxal artacaq:

"Ölkədə alıcılıq qabiliyyətinin aşağı olması və yerli istehsalın zəif olması Çin məhsullarının daxili bazarlarda satış imkanını artırır. ABŞ-Çin arasındakı ticarət müharibəsi eyni zamanda Azərbaycandan Çinə daha çox valyuta axınına səbəb olacaq. Azərbaycanlı sahibkarlar bazardakı inhisarçılıq səbəbindən daha çox mənfəət götürməyə çalışacaqlar. Mənfəət normaları yüksələcək. Eyni zamanda ölkəyə idxalın həcmini artırmaqla yerli istehsalın aşağı maya dəyərli idxal məhsulları ilə rəqabət imkanlarını məhdudlaşdıran konyuktur formalaşacaq. Azərbaycanda Çindən gətirilən məhsullara alternativ mallar var (Türkiyə və Yaxın Şərq ölkələrindən gətirilir). Çində valyuta dəyərsizləşdikcə, həmin məhsulların əvəzediciləri, daha az rəqabətli olacaq. Bu, digər ölkələrdən gələn məhsulları müəyyən qədər sıxışdıra bilər".

İqtisadçı bildirib ki, ABŞ-la Çin arasında ticarət münasibətlərində yaranan problem, xüsusilə də məzənnəyə öz təsirini göstərəcək:

"Ticarət müharibəsi dedikdə, burada yeni şərtlər daxilində xarici ticarət münasibətlərinin qurulmasından söhbət gedir. ABŞ bunu yerli biznesi və istehsalı qoruma cəhdi kimi təqdim etməyə çalışır. Bu isə yanlış mövqedir. Çin və ABŞ arasında ticarət dövriyyəsi 600 milyard ABŞ dollarından çoxdur. Növbəti ildə Çindən idxal olunan 200 milyard dollarlıq məhsula əlavə olaraq 10%-lik istehlak rüsumunun tətbiq edilməsi nəzərdə tutulub. Bu, böyük ehtimalla Çinin də adekvat formada cavab addımları atacağına gətirib çıxaracaq. Çin kimi inkişaf etməkdə olan ölkələrin ABŞ-ın idxalına böyük ehtiyacı var. ABŞ ən böyük alıcılardan biridir. Dünya iqtisadiyyatının dörddə birinə sahib olan ölkədir. Çin məhsullarını ABŞ bazarlarına təqdim etmədiyi təqdirdə öz iqtisadiyyatında problemlər yaşayacaq. Çin iqtisadiyyatı ixrac yönümlüdür. O, dünyanın ən böyük strateji valyuta ehtiyatlarına malik ölkələrindən biridir. Buna baxmayaraq nəzərə almaq lazımdır ki, Çində ixracın zəifləməsi hökumətin məzənnə ilə bağlı siyasətə yenidən baxmasına gətirib çıxaracaq".

Xatırladaq ki, 2017-ci ildə Azərbaycanla Çin arasında ticarət dövriyyəsi 1,3 milyard dollar təşkil edib. 2017-ci ilin yanvar-mart aylarında Çindən 148 milyon 664,33 min dollar dəyərində mal idxal edilib. Onun əsas hissəsini isə geyim təşkil edib. Digər yerləri pirotexnika, qadın çantası, gön və dəridən hazırlanmış digər məişət məhsulları, kişilər üçün pambıq parçası olan ip, yundan və trikotajdan şalvar kombinezon və şortlar, qadınlar üçün sintetik sapdan önlüklər və qayışlı kombinezonlar, şalvarlar və briclər, sarımsaq bölüşür.