Britaniya yeni sanksiya siyahısı hazırlayır

Böyük Britaniya Səudiyyə Ərəbistanının rəsmilərinə qarşı sanksiya tətbiq etməyə hazırlaşır.

"Kommersant.az" xəbər verir ki, buna səbəb jurnalist Camal Qaşıqçının itkin düşməsi məsələsi olub. Məlumata görə, sanksiya siyahısını Böyük Britaniyanın Xarici İşlər Nazirliyi hazırlayır. Sanksiyalar barədə yekun qərar isə araşdırmadan sonra veriləcək. Lakin Xarici İşlər Nazirliyi məsələyə şərh verməkdən imtina edib.

Qeyd edək ki, tanınmış müxalifətçi ərəb jurnalist, "Washington Post" qəzetinin müxbiri C.Qaşıqçı, oktyabrın 2-də Səudiyyə Ərəbistanının İstanbuldakı Baş Konsulluğuna gedib və itkin düşüb. O, 2017-ci ildən ABŞ-da yaşayırdı.

Səudiyyə Ərəbistanı hökuməti Camal Qaşıqçının, konsulluğun binasını tərk etdikdən sonra itkin düşdüyünü bildirir. Türkiyə prezidenti Rəcəb Tayyib Ərdoğan isə bildirib ki, Səudiyyə Ərəbistanı, jurnalistin itməsi ilə əlaqəsi olmadığını sübut etməlidir. Türkiyə xarici işlər nazirliyinin sözçüsü Hami Aksoyun sözlərinə görə, Türkiyə Səudiyyə Ərəbistanından, İstanbulda yerləşən Baş Konsulluğunda baxış aparmaq üçün icazə alıb.