NASA-nın Aya enişi 2026-cı ilə təxirə salınıb

ABŞ Milli Aeronavtika və Kosmik Agentliyi (NASA) elmi araşdırmalar üçün Aya astronavt göndərilməsini nəzərdə tutan Artemida Missiyasında ekipajın Aya enişinin 2026-cı ilə təxirə salındığını açıqlayıb.

NASA-nın verdiyi yazılı açıqlamada, kosmik gəmi ilə bağlı təhlükəsizlik narahatlıqları ilə yanaşı, astronavtların kostyumları və eniş maşınlarında da problemlərin olduğu bildirilib.

Açıqlamada astronavtların Aya enişinin 2026-cı ilin sentyabrına təxirə salındığı bildirilib.

Açıqlamada layihənin tarixinin dəyişdirilməsinin əsas səbəbinin "ekipaj təhlükəsizliyi" olduğu və komandaların bütün çətinlikləri titizliklə idarə etdiyi vurğulanıb.

NASA Administratoru Bill Nelson "Təhlükəsizlik bizim əsas prioritetimizdir" dedi.

Nelson qeyd edib ki, bu gecikmələr Artemis komandalarına çətinlikləri aradan qaldırmaq üçün daha çox vaxt verəcək.

Artemida missiyası çərçivəsində elmi araşdırmalar aparmaq üçün Aya 4 astronavt göndərilməsi planlaşdırılır.

Eyni proqram çərçivəsində ABŞ Ayda daimi baza yaratmağı və Aydan Marsa səyahət üçün dayanacaq kimi istifadə etməyi və orada qiymətli metalların çıxarılmasını nəzərdə tutur.