AZAL təyyarəsinin qəzaya uğraması nəticəsində 12 nəfər sağ qalıb

AZAL təyyarəsinin qəzaya uğraması nəticəsində 12 nəfər sağ qalıb - YENİLƏNİB

“Azərbaycan Hava Yolları” QSC-nin (AZAL) məlumatına görə, göyərtədə 62 sərnişin, 5 ekipaj üzvü olmaqla, ümumilikdə 67 nəfər olub. Sərnişinlər arasında uşaqlar olmayıb, zərərçəkənlər barədə məlumat tezliklə təqdim ediləcək. Məlumata görə sağ qalanlar var, onlara ilkin tibbi yardım göstərilir.

Qazaxıstan tərəfi ilə təmaslar həyata keçirilir və hadisə yerində Qazaxıstanın fövqəladə xilasetmə qurumları tərəfindən lazımi operativ zəruri dəstək göstərilir.

"Kazinform"un məlumatına görə, AZAL-a məxsus təyyarənin Aktauda qəzaya uğradığı yerdən 12 nəfər müxtəlif xəsarətlərlə Manqistau vilayət xəstəxanasına çatdırılıb.

***
11:32

“Azərbaycan Hava Yolları” QSC-nin (AZAL) J2-8243 nömrəli Bakı-Qroznı reysini yerinə yetirən “Embraer 190” təyyarəsi Aktau şəhərinin 3 km yaxınlığında qəza enişi edib.

Kommersant.az Qazaxıstan KİV-ə istinadən xəbər verir ki, bu barədə təcili xidmət orqanları məlumat yayıb.

Məlumata görə, qəza nəticəsində 10 nəfər sağ qalıb.

Qeyd edilib ki, baş verən yanğın söndürülüb.