30.10.2023 Siyasət

0 0

Əl-Cəzirə televiziyasına danışan İran prezidenti Rəisi İsrailin törətdiyi cinayətlərin humanitar və hərbi qırmızı xətləri keçdiyini və bu vəziyyətin hər kəsi hərəkətə keçməyə sövq edə biləcəyini bildirib.

Rəisi ABŞ-ın İsrailə dəstəyinə işarə edərək, "Vaşinqton sionist rejimə geniş dəstək verərkən bizdən heç bir tədbir görməməyimizi xahiş edir, lakin bu, etibarsız tələbdir" deyib.

Vaşinqton administrasiyasının bununla bağlı “müqavimət oxuna” yazılı mesajlar göndərdiyini bildirən Rəisi, İranın dəstəklədiyi milislərin bölgədəki ABŞ qüvvələrinə qarşı hücumlarına diqqət çəkib.

Rəisi, bununla belə, bölgədəki İranın dəstəklədiyi milislər və Fələstin müqavimət qruplarının öz qərarlarını verdiyini və Tehrandan əmr almadıqlarını müdafiə etdi.

ABŞ-ın bölgədə tamamilə səhv hesablamalar apardığını və "yeni Yaxın Şərq" yaratmaq məqsədinə heç vaxt nail olmayacağını bildirən Rəisi, "Sionist rejim və Amerikanın dəstəyi Fələstin müqavimətini aradan qaldırmaq gücünə malik deyil. ABŞ hazırkı imkanlarımızı çox yaxşı bilir və onları aşmaqdan söhbət gedə bilməz" deyib.

İran prezidenti, "ABŞ və bəzi Avropa ölkələri Qəzzada atəşkəsin qarşısını alır və bu, cinayətdir. Biz bütün ərəb, islam ölkələri və dünyanın digər dövlətləri ilə birlikdə dərhal atəşkəsin tərəfdarıyıq" deyib.