01.12.2023 Siyasət

0 0

Ağ Evin Milli Təhlükəsizlik Şurasının Strateji Kommunikasiyalar üzrə koordinatoru Con Kirbi Qəzzada qalıcı atəşkəsi dəstəkləmədiklərini, lakin “humanitar fasilənin” uzadılmasını istədiklərini bildirib.

Kirbi Ağ Evdə keçirdiyi mətbuat konfransında İsrail və HƏMAS arasındakı münaqişədə “humanitar pauza”dan danışıb.

Qərbi Qüdsün girişində israillilərə qarşı silahlı hücumun Qəzzada "humanitar fasiləyə" təsir edib-etməyəcəyi sualına isə Kirbi, sözügedən zorakılığın razılaşmanın uzadılmasında hər hansı bir təsirinin olacağını düşünmədiyini bildirib.

Kirbi Qəzzada qalıcı atəşkəsi dəstəkləmədiklərini, lakin 7 günlük “humanitar fasilənin” 8, 9, 10 və sonrasına qədər uzadılmasını istədiklərini qeyd edib.

Son nəticədə İsrail və HƏMAS-ın bu razılaşmanın uzadılması ilə bağlı parametrləri razılaşdırmalı olduğunu bildirən Kirbi ABŞ-ın “humanitar fasilənin” uzadılmasını dəstəkləyəcəyini bildirib.

Kirbi, Qəzza xalqına daha çox qida, su, dərman və yanacaq çatdırmaq üçün son bir həftədə sahədə görülən işlərin diqqətdən kənarda qalmaması lazım olduğunu ifadə edərək, "humanitar fasilənin" uzadılması üçün çox çalışdıqlarını vurğulayıb.
​