Aİ sammitindən “Qəzzada atəşkəs” çağırışı olmayıb

Avropa İttifaqı (Aİ) liderləri oktyabrın 7-dən sonra keçirdikləri üçüncü iclasda Qəzzada atəşkəs çağırışı ilə bağlı konsensusa gələ bilməyiblər.

Avropa İttifaqı Şurasının sədri Çarlz Mişel Brüsseldə keçirilən 2 günlük Aİ liderlərinin sammitinin sonunda mətbuat konfransı keçirib. Mişel görüşün ən mühüm gündəm bəndlərindən birinin İsrail-Fələstin münaqişəsi olduğunu bildirib.

Bəzi üzv ölkələr arasında hərbi əməliyyatların dayandırılması ilə bağlı fərqli fikirlərin olduğunu ifadə edən Mişel, "Bəziləri "humanitar fasilə", bəziləri isə "humanitar atəşkəs" istəyir" dedi.

Bununla belə, Mişel qeyd edib ki, humanitar yardıma sadiqlik və iki dövlətli həll istiqamətində siyasi prosesə sadiqlik bütün liderlər tərəfindən qəbul edilib.

Belə ki, oktyabrın 7-dən sonra əvvəlcə oktyabrın 17-də fövqəladə sammitdə, ikincisi isə 26-27 oktyabrda keçirilən adi sammitdə bir araya gələn Aİ liderləri üçüncü dəfə atəşkəs çağırışı ilə bağlı razılığa gələ bilməyiblər.

İrlandiyanın baş naziri Leo Varadkar sammitdən sonra jurnalistlərə verdiyi açıqlamada, Qəzzada böyük əksəriyyətin istədiyi atəşkəs çağırışının konsensus olmaması səbəbindən həyata keçirilə bilmədiyini bildirib:

"Bizim fikrimiz budur ki, atəşkəs çağırışı ilə bağlı konsensusa gələ bilməsək, hansısa müvəqqəti atəşkəs və ya müvəqqəti fasilələr təklif etməyin mənası yoxdur".