17.01.2024 Siyasət

0 0

Demokratlar və Respublikaçılar Konqresdə qarşılıqlı konsensusa gəlməli və Ukraynaya və ABŞ-ın digər müttəfiqlərinə birgə kömək etmək üçün bir araya gəlməlidirlər. NATO-nun keçmiş baş katibi Anders Foq Rasmussen “Politico”ya müsahibəsində buna çağırıb.

“Demokratlar məndən nə edəcəyimi soruşsalar, sərhəddəki problemlə bağlı respublikaçıların fikirlərini nəzərə almağı və dörd elementdən ibarət paket yaratmağı məsləhət görərdim: Ukrayna, İsrail, Tayvana dəstək və sərhəd məsələsi. Mən Demokrat Partiyasının kampaniyasına rəhbərlik etsəydim, bu məsələni bağlamaqdan çəkinməzdim”, - deyə keçmiş baş katib bildirib.

Rasmussen həmçinin bildirib ki, ABŞ-ın Ukraynaya yardımını kəsməsi “Moskvanın qalib gəlməsinə və Vaşinqtonu zəiflətməsinə yol aça bilər”. Bundan əlavə, keçmiş siyasətçi “Respublikaçılar Partiyasının Trampizmə dönüşü və təcrid ideyalarının artan təsirindən” razı olmadığını bildirib.

Bundan əvvəl NATO-nun hazırkı baş katibi Yens Stoltenberq ABŞ Konqresinin fikir ayrılıqlarına baxmayaraq, Ukraynaya yeni yardım paketini təsdiq edə biləcəyinə əmin olduğunu bildirib. O, bunun mümkün qədər tez həyata keçirilməli olduğunu da bildirib. Həmçinin, onun fikrincə, bütün çətinliklərə baxmayaraq, avropalı müttəfiqlər Kiyevə silah göndərməkdə davam edirlər.