02.02.2024 Siyasət

0 0

Böyük Britaniyanın Rusiyadakı səfirliyi Stalinqrad döyüşünün başa çatmasının ildönümündə şəhər sakinlərinə ehtiramını bildirib. Bu barədə Moskvadakı diplomatik nümayəndəliyin Telegram kanalında məlumat verilib.

“2 fevral 1943-cü ildə - düz 81 il əvvəl - Stalinqrad döyüşü başa çatıb. Bu döyüş altı aydan çox davam etdi, bəşər tarixində ən qanlı döyüşlərdən birinə çevrildi və Avropada İkinci Dünya Müharibəsinin gedişatını dəyişdirdi”, - deyə səfirlikdən bildiriblər.

Həmçinin qeyd edilir ki, bu gün Rusiya və Böyük Britaniya birlikdə döyüş tarixini “ümumi düşmənə qarşı mübarizə” kimi xatırlayırlar. Britaniya tərəfi “Stalinqrad (Volqoqrad) sakinlərinin fədakarlığına hörmət etdiyini” vurğuladı.

Stalinqrad döyüşü 1942-ci il avqustun 23-dən 1943-cü il fevralın 2-dək davam etdi. Döyüş İkinci Dünya Müharibəsi illərində Britaniya, Amerika və Kanada ictimaiyyətinin böyük marağına səbəb oldu. Xüsusilə, Britaniya tərəfi Stalinqrad sakinlərinə dəstək və həmrəylik kampaniyası təşkil edib, həm də şəhərə ünvanlı humanitar yardım göndərib.

1943-cü ildə Tehran konfransı zamanı Böyük Britaniyanın baş naziri Uinston Çörçill Kral VI Corc adından SSRİ lideri İosif Stalinə hədiyyə olaraq “Stalinqrad qılıncı” təqdim etdi. Bu hadisə Britaniya cəmiyyətində Stalinqrad döyüşünün ən məşhur anım aksiyalarından birinə çevrildi.