Putin Qərb ölkələrinə: Siz III Dünya Müharibəsinin bir addımlığındasınız

Rusiyada keçirilən prezident seçkilərində qalib gələn Vladimir Putin Qərb ölkələrinə Rusiya ilə NATO dövlətləri arasında Üçüncü Dünya Müharibəsinin yaxınlaşması barədə xəbərdarlıq edib, lakin heç kimin belə bir müharibə istəmədiyini bildirib.

Rusiyada “İctimai Rəy” Fondunun keçirdiyi “exit-poll”un nəticələrinə görə, Putin 87,8% səs toplayıb və postsovet Rusiya tarixində ən çox səs toplayan siyasətçi olub.

İlk dəfə 1999-cu ildə hakimiyyətə gələn 71 yaşlı Putin daha 6 il hakimiyyətdə qalacaq. Putin 6 illik səlahiyyət müddətini başa vursa, o, İosif Stalini keçəcək və Rusiyada son 200 ildə ən uzun müddət hakimiyyətdə olan lider olacaq.

Mən nüvə silahından istifadə etməyə ehtiyac hiss etmədim

Ukrayna müharibəsi 1962-ci ildə Kuba raket böhranından sonra Moskvanın Qərblə münasibətlərində ən dərin böhrana səbəb oldu. Putin tez-tez nüvə müharibəsi riskləri barədə xəbərdarlıq edir, lakin Ukraynada nüvə silahından istifadə etmək zərurətini heç vaxt hiss etmədiyini deyib.

Keçən ay verdiyi açıqlamada Fransa prezidenti Emmanuel Makron gələcəkdə Ukraynaya quru qoşunlarının yerləşdirilməsi ehtimalını xatırladıb. Bir çox Qərb dövlətləri bundan uzaq dursa da, Avropanın şərqindəki bəzi ölkələr də öz dəstəklərini bildiriblər.