Putindən F-16 xəbərdarlığı: Harada olursa olsun, qanuni hədəfimiz olacaq

Rusiya lideri Putin Ukraynaya veriləcək F-16 döyüş təyyarələrinin üçüncü ölkələrin hava limanlarından istifadə etdikləri təqdirdə harada olurlarsa olsunlar, qanuni hədəflər olacaqları ilə bağlı xəbərdarlıq edib.

Rusiya prezidenti Vladimir Putin Tver vilayətində Rusiya Müdafiə Nazirliyinin ordu aviasiya təlim mərkəzinə baş çəkib.

Burada hərbi pilotlarla söhbət edən Putin Rusiya ordusunun aviasiya bölməsinin Ukraynadakı münaqişələrdə mükəmməl işlədiyini və nəticəyə töhfə verdiyini bildirib.

Dəfələrlə döyüş təyyarəsi ilə uçduğunu və döyüş təyyarəsi pilotlarının işinin çətin olduğunu bildirən Putin Rusiyanın Su-34 bombardmançı, Su-30 və Su-57 yeni model döyüş təyyarələrinin münaqişə bölgəsində çox yaxşı iş gördüyünü qeyd edib.

“Digər silahlar kimi F-16-ları da məhv edəcəyik”

Qərb ölkələrinin Ukraynaya F-16 döyüş təyyarələri vermə planı və ukraynalı pilotların yetişdirilməsi ilə bağlı qiymətləndirmələr edən Putin, “Bu, münaqişə bölgəsində heç nəyi dəyişməyəcək. Bu gün tankları, zirehli texnikaları və digər hərbi texnikanı, o cümlədən çoxsaylı buraxılış sistemlərini məhv etdiyimiz kimi (F-16 model) təyyarələri də məhv edəcəyik” deyib.

F-16 döyüş təyyarələrinin nüvə silahı daşıma qabiliyyətinə malik olduğuna diqqət çəkən Putin, bu təyyarələrlə döyüşərkən bunu nəzərə alacaqlarını bildirib.