Çin səhiyyə sektorunu xarici kapitala açır

Çin xarici investorlara bəzi şəhərlərdə xəstəxanalar və biotexnoloji fəaliyyətlər aparmağa icazə verəcəyini açıqlayıb.

Çin Ticarət Nazirliyi, Milli Səhiyyə Komissiyası və Milli Sağlamlıq Məhsulları İdarəsi tərəfindən açıqlanan yeni qaydaya əsasən, xarici investorlara Pekin, Tianjin, Şanxay, Nancing, Sucou, Fucou, Guangcou, Sincan və digər şəhərlərdə xəstəxanaların fəaliyyət göstərməsinə icazə veriləcək.

Xarici investorlar həmçinin Pekin və Şanxay şəhərlərində, Quanqdonq və Haynan əyalətlərində biotexnologiya sektorunda fəaliyyət göstərə, insan kök hüceyrəsi və gen diaqnostikası texnologiyalarında tədqiqat və tətbiqlər apara, milli səviyyədə etibarlı kütləvi istehsal və bazar lisenziyaları üçün müraciət edə biləcəklər.

İstehsal sektoruna qoyulan bütün məhdudiyyətlər aradan qaldırılıb

Digər tərəfdən, Çin Ticarət Nazirliyi və Milli İnkişaf və İslahat Komissiyası xarici sərmayə qoyuluşunun qadağan olunduğu sektorların yer aldığı “mənfi siyahı”nın yenilənmiş variantını dərc edib.

Sonuncu dəfə 2021-ci ildə yenilənən neqativ siyahının yeni versiyasında bütün istehsal sektorlarında xarici investisiyalara qoyulan məhdudiyyətlər aradan qaldırılıb.

Yeni siyahıda məhdudiyyətlərə məruz qalan sektorların sayı 31-dən 29-a endirilib.

İstehsal sektorundan kənarda, Pekin, Şanxay, Sincan və Haynanda azad ticarət pilot zonalarında bulud hesablamaları, internet məlumat mərkəzləri, məzmunun çatdırılması şəbəkələri və internet xidmət provayderləri kimi əlavə dəyərli telekommunikasiya xidmətlərinə xarici investisiya məhdudiyyətləri qaldırılıb.

Xarici investisiyaların azalması davam edir

Hökumətin səhiyyə, biotexnologiya və məlumat xidmətləri, eləcə də istehsal kimi sektorları açmaq üçün atdığı addım birbaşa xarici investisiyaların azalmasına qarşı investorların inamını bərpa etmək üçün atılan addım kimi qiymətləndirilir.