16.09.2024 Siyasət

0 0

Rusiya Müdafiə Nazirliyindən verilən yazılı açıqlamada Rusiya ilə Ukrayna arasında əsir mübadiləsinin olduğu bildirilib.

Açıqlamada əsir mübadiləsi nəticəsində Rusiyanın Kursk bölgəsində əsir götürülən 103 rus əsgərinin azad edildiyi, 103 Ukrayna hərbçisinin isə Ukrayna tərəfinə təhvil verildiyi bildirilib.

Bəyanatda azadlığa buraxılan rusiyalı hərbçilərin hazırda Belarusda olduğu, onlara lazımi psixoloji dəstək və sağlamlıq xidmətinin göstərildiyi, yaxınları ilə əlaqə saxlamaq imkanı verildiyi deyilib.

Açıqlamada, "Sərbəst buraxılan bütün hərbi qulluqçular Rusiya Müdafiə Nazirliyinə bağlı səhiyyə müəssisələrində müalicə və reabilitasiya üçün Rusiya Federasiyasına təhvil veriləcək" deyilir.

Bundan əlavə, bəyanatda Birləşmiş Ərəb Əmirliklərinin (BƏƏ) Rusiya hərbçilərinin mübadiləsi zamanı humanitar vasitəçilik səyləri həyata keçirdiyi bildirilir.

Ukraynadan açıqlama

Ukrayna prezidenti Vladimir Zelenski Telegram hesabından verdiyi yazılı açıqlamada Rusiya ilə daha bir məhbus mübadiləsi aparıldığını bildirib.

Əsirlərin dəyişdirilməsi nəticəsində daha 103 Ukrayna əsgərinin evlərinə qaytarılmasının mümkün olduğunu qeyd edən Zelenski, əsir mübadiləsi prosesinə verdiyi töhfələrə görə komandasına təşəkkür edib.