Bayden: Yaxın Şərqdə hərtərəfli müharibənin olacağına inanmıram

ABŞ prezidenti Co Bayden Ağ Evdə İsrailin Livana hücumları ilə bağlı jurnalistlərin suallarını cavablandırıb. Yaxın Şərqdə hərtərəfli müharibənin qarşısının alına biləcəyinə əmin olub-olmaması ilə bağlı suala Bayden, "Tam miqyaslı müharibənin olacağına inanmıram. Düşünürəm ki, bundan qaça bilərik" dedi.

Ağ Evdə mətbuata açıqlama verən Bayden əlavə edib ki, mümkün genişmiqyaslı müharibənin qarşısını almaq olar, lakin bunun üçün "görüləcək çox şey" var.

Amerika qüvvələrinin İsrailə kömək üçün göndərilib-göndərilməyəcəyi ilə bağlı suala Bayden ABŞ-ın artıq İsrailə kömək etdiyini bildirib və “Biz İsraili qoruyacağıq” deyib. Baydenin bəyanatları İranın oktyabrın 1-də İsrailə qarşı atdığı ballistik raketlərdən sonra gəlib.

İranın raket hücumları

İran İnqilab Keşikçiləri Korpusu oktyabrın 1-də İsrailə raket hücumunun İranın “milli təhlükəsizliyini” hədəf aldığını bildirib. Hücumun HƏMAS lideri İsmayıl Haniyə, Hizbullah lideri Həsən Nəsrullah və iranlı briqada generalı Abbas Nilfuruşanın öldürüldüyü İsrail hücumlarına cavab olaraq həyata keçirildiyi bildirilib.

İran dövlət televiziyası İsrailə 200-ə yaxın raket atıldığını və ilk dəfə hipersəsli Fəttah-1 raketlərindən istifadə edildiyini açıqlayıb. İsrailin baş naziri Benyamin Netanyahu da İranın raket hücumu ilə "böyük səhv etdiyini və bunun əvəzini ödəyəcəyini" deyib.