Dünya Bankı Hindistana artım xəbərdarlığı edir

Dünya Bankı Hindistanın 2047-ci ilə qədər yüksək gəlirli ölkəyə çevrilməsi üçün illik orta hesabla 7,8 faiz böyüməsi lazım olduğunu və bu hədəfə çatmaq üçün hərtərəfli islahatların vacib olduğunu bildirib.

Dünya Bankı Hindistan iqtisadiyyatı ilə bağlı “Bir nəsildə yüksək gəlirli iqtisadiyyata çevrilmək” adlı araşdırmasını dərc edib. Sözügedən hesabatla bağlı edilən açıqlamada Hindistanın 2000-2024-cü illər arasında orta hesabla yüzdə 6,3 olan sürətli böyüməsi və ölkənin keçmiş uğurlarının gələcək hədəflərinin əsasını təşkil etdiyi bildirilib.

Lakin bu məqsədə çatmaq üçün islahatların və onların həyata keçirilməsinin ən azı hədəfin özü qədər iddialı olmasının vacibliyi vurğulanıb və Hindistanın növbəti 22 ildə inkişaf trayektoriyası ilə bağlı ssenarilər dəyərləndirilib.

Orta illik 7,8 faiz artım tələb olunur

Ölkəyə yüksək gəlir statusu əldə etməyə imkan verən ssenari Hindistandan ştatlar arasında daha sürətli və inklüziv inkişafa nail olmağı, 2035-ci ilə qədər ümumi investisiyaları ümumi daxili məhsulun 33,5 faizindən 40 faizə yüksəltməsini, işçi qüvvəsinin iştirakını 56,4 faizdən 65 faizə yüksəltməsini və məhsuldarlığın artımını sürətləndirməsini tələb edir.

Hindistanın 2047-ci ilə qədər hədəfinə çatmaq üçün illik orta hesabla 7,8 faiz böyüməsi lazım olduğuna diqqət çəkən açıqlamada ölkənin son üç maliyyə ilində orta artım tempini 7,2 faizə yüksəltdiyi xatırladılıb. Bəyanatda bu sürəti qorumaq və orta hesabla 7,8 faizlik artım tempinə nail olmaq üçün siyasət tədbirləri də tövsiyə olunub.