02.04.2025 Siyasət

0 0

Rusiya ilə Amerika Birləşmiş Ştatları (ABŞ) arasında gərgin münasibətlərin yumşaldılmasına yönəlmiş təmaslar davam edərkən, Moskva administrasiyası bu prosesin ikinci iclasının İstanbulda keçiriləcəyini açıqlayıb. Bu sözləri Rusiya Xarici İşlər naziri Sergey Lavrov paytaxt Moskvada keçirdiyi mətbuat konfransında deyib.

Lavrov ABŞ-la münasibətlərin normallaşması üçün danışıqların davamı olan ikinci görüş üçün İstanbulun seçildiyini bildirib, lakin görüşün tarixi ilə bağlı dəqiq məlumat paylaşmayıb. Bununla belə, o, Rusiya prezidenti Vladimir Putinin ondan və müdafiə naziri Andrey Belousovdan Ukrayna üzrə danışıqlarda əldə edilən irəliləyişlə bağlı ətraflı brifinq tələb etdiyini açıqlayıb.

Lavrov görüşün gündəliyinin əsasən üç mövzu ətrafında formalaşdığını deyib: enerji infrastrukturunu hədəf alan hücumlara qarşı moratoriumun tətbiqi, Ukraynadakı münaqişənin həlli yollarının axtarılması və Qara Dəniz Taxıl Təşəbbüsünün yenidən işə salınması. Lavrov bu mövzulara əlavə olaraq, ikitərəfli münasibətlərə, xüsusən də diplomatik kanalların fəaliyyətinə xələl gətirən “narahat edici elementlərin” aradan qaldırılmasının digər mühüm gündəm maddəsi olduğunu bildirib.

Xarici işlər naziri bu elementlərin Rusiyanın Vaşinqtondakı və ABŞ-ın Moskvadakı səfirliyinin fəaliyyətini ciddi şəkildə pozduğunu və tərəflərin bu istiqamətdə irəliləyiş əldə etməyə çalışdıqlarını bildirib. Lavrov qeyd edib ki, bu problemlərin kökləri 2009-2017-ci illər arasında xidmət etmiş Barak Obama administrasiyasına gedib çıxır və səfirlik problemləri təkcə son hadisələrlə bağlı deyil.