25.04.2025 Siyasət

0 0

ABŞ prezidenti Trampın Səudiyyə Ərəbistanına səfəri öncəsi 100 milyard dolları keçən silah satışı təklifi hazırladığı iddia edilib. Paketə nəqliyyat təyyarələri, radar və raket sistemləri daxildir.

Britaniyanın Reuters xəbər agentliyi altı mənbəyə istinadən xəbər verir ki, ABŞ prezidenti Donald Tramp may ayında səfər edəcəyi Səudiyyə Ərəbistanına 100 milyard dollardan çox dəyərində silah satmağı təklif edəcək.

ABŞ müdafiə rəsmisi deyib: “Səudiyyə Ərəbistanı Krallığı ilə müdafiə əlaqələrimiz Prezident Trampın rəhbərliyi altında həmişəkindən daha güclüdür. Təhlükəsizlik sahəsində davamlı əməkdaşlığımız bu tərəfdaşlığın əsas komponenti olaraq qalır və biz Səudiyyə Ərəbistanı ilə onun müdafiə ehtiyaclarını ödəmək üçün işləməyə davam edəcəyik".

İki mənbə ABŞ-da yerləşən Lockheed Martin müdafiə və aviasiya şirkətinin C-130 nəqliyyat təyyarəsi də daxil olmaqla bəzi qabaqcıl silah sistemlərini təmin edə biləcəyini söylədi. Mənbə Lockheed-in həmçinin raket və radar sistemləri tədarük edəcəyini bildirib. Mənbələr müdafiə şirkətlərinin bəzi rəhbərlərinin bölgəyə səfər etməyi düşündüyünü bildirib. Səudiyyə Ərəbistanının illərdir maraqlandığı bildirilən Lockheed istehsalı olan F-35 təyyarələri ilə bağlı razılaşmanın müzakirə ediləcəyini bildirən mənbələr, Trampın səfəri zamanı F-35 müqaviləsi imzalanma ehtimalının az olduğunu qeyd edib.

Vaşinqton-Riyad münasibətləri

ABŞ uzun müddətdir ki, Səudiyyə Ərəbistanına silah verir. Tramp 2017-ci ildə prezident kimi ilk dövründə Səudiyyə Ərəbistanına təxminən 110 milyard dollarlıq satış təklif etmişdi. 2018-ci ilə qədər cəmi 14,5 milyard dollarlıq satışa başlanılıb. Satışa son təsdiqi verən ABŞ Konqresi səudiyyəli jurnalist Camal Qaşıqçının qətlindən sonra sövdələşmələri şübhə altına almağa başlayıb. 2021-ci ildə Co Bayden vəzifədə olarkən Konqres Səudiyyə Ərəbistanına ağır mülki itkilərə səbəb olan Yəmən müharibəsini və Kaşıkçı qətlinə son qoyması üçün təzyiq göstərmək məqsədilə hücum silahlarının satışını qadağan etdi. Bayden administrasiyası 2022-ci ildə Rusiyanın Ukraynaya müdaxiləsi qlobal neft tədarükünə təsir etdikdən sonra Səudiyyə Ərəbistanına qarşı mövqeyini yumşaltmağa başlamışdı. Hücum silahlarının satışına qoyulan qadağa 2024-cü ildə 7 oktyabr hücumlarından sonra qaldırıldı, ABŞ müharibədən sonrakı Qəzza planını hazırlamaq üçün Səudiyyə Ərəbistanı ilə daha sıx əməkdaşlıq etdi.