26.04.2023 Problemli Banklar

11 0

Kommersant.az bankın hesabatına istinadən xəbər verir ki, “UniBank”ın istehlak kreditləri 31 milyon 667 min manat artaraq 578 milyon 873 min manata çatıb. Bankın biznes kreditləri isə 15 milyon 472 min manat artaraq 289 milyon 797 min manata yüksəlib. Həmçinin ipoteka kreditləri də 3 milyon 840 min manat artaraq 71 milyon 902 min manata bərabər olub. Nəticədə bankın kredit portfeli 2022-ci ilin sonu ilə müqayisədə 50 milyon 978 min manat artaraq 940 milyon manata çatıb. Amma bu artımlar bankın cəmi aktivlərinə ciddi təsir göstərə bilməyib. Çünki “UniBank”ın banklar və digər maliyyə institutlarındakı depozitləri 11 milyon 291 min manat və ya 17.8 faiz azalaraq 51 milyon 994 min manata enib. Ən yüksək azalma isə digər aktivlərin payına düşüb. Belə ki, “UniBank”ın digər aktivləri 2022-ci ilin sonu ilə müqayisədə 56 milyon 524 min manat və ya 46.86 faiz azalaraq 64 milyon 78 min manata düşüb.

Nəticədə bankın cəmi aktivləri 2022-ci ilin sonu ilə müqayisədə 5 milyon 524 min manat artaraq 1 milyard 446 milyon 168 min manata yüksəlib.

DEPOZİT PORTFELİ ÖHDƏLİKLƏR CƏMİNİ ARTIRA BİLMƏYİB

Bankın müştərilərindən topladığı depozitlərin həcmi ötən ilin sonu ilə müqayisədə 11 milyon 514 min manat artaraq 1 milyard 1 milyon 258 min manata çatıb. Bu cüzi artımda fiziki şəxslərin depozitləri 4 milyon 681 min manat artaraq 776 milyon 38 min manata, hüquqi şəxslərin depozitləri isə 6 milyon 832 min manat artaraq 225 milyon 220 min manata çatıb. Amma bankın cəmi öhdəlikləri cəmi 1 milyon 59 min manat və ya 0.08 faiz artıb. Çünki digər öhdəliklərin həcmi 30 milyon 752 min manat və ya 46.53 faiz azalaraq 35 milyon 329 min manata enib.

YIĞILMIŞ ZƏRƏRİ AZALIB

Səhmdar kapitalında dəyişiklik etməyən “UniBank”ın yığılmış zərəri 4 milyon 295 min manat və ya 12.25 faiz azalaraq 30 milyon 744 min manata düşüb. Ümumi ehtiyatlarını işi 171min manat artıraraq 9 milyon 921 min manata çatdırıb. Nəticədə bankın cəmi kapitalı ötən ilin sonu ilə müqayisədə 4 milyon 466 min manata artaraq 117 milyon 861 min manata bərabər olub.

FAİZ GƏLİRLƏRİ ƏMƏLİYYAT MƏNFƏƏTİNİ ARTIRIB

Bankın faiz gəlirləri 11 milyon 315 min manat artaraq 48 milyon 622 min manata, faiz xərcləri isə 2 milyon 951 min manat artaraq 16 milyon 331 min manat olub. Buna görə də bank 30 milyon 807 min manat xalis faiz gəliri əldə edib ki, bu da ötən ilin sonu ilə müqayisədə 9 milyon 117 min manat çoxdur.

Qeyri-faiz gəliri 15 milyon 545 min manat aratarq 26 milyon 167 min manata, qeyri-faiz xərcləri isə 12 milyon 331 min manat artaraq 42 milyon 757 min manata bərabərləşib. Nəticədə bankın əldə etdiyi əməliyyat mənfəəti 12 milyon 330 min manat arataraq 14 milyon 216 min manata yüksəlib.

Məcmu kapitalı isə 5 milyon 892 min manat və ya 4.6 faiz artaraq 133 milyon 501 min manatda qərarlaşıb.

Qeyd edək ki, bank əldə etdiyi aktivlərinin gəlirliyini (ROA) 0.91 faiz artıraraq 29.66 faizə bərabər etsə də, kapitalının gəlirliyini (ROE) 0.01 faiz azaldaraq 3.64 faizə endirib.