26.04.2023 Problemli Banklar

29 3

Kommersant.az bankın maliyyə hesabatına istinadən xəbər verir ki, “Bank VTB”nin kredit portfelinin artması bankın cəmi aktivlərini yüksəldib. Belə ki, bankın cəmi aktivləri 2022-ci ilin son rübü ilə müqayisədə 9 milyon 585 min manat artaraq 248 milyon 78 min manata çatıb. Bu artımda kredit portfelinin payı 85 faiz təşkil edib. Bankın kredit portfeli 8 milyon 137 min manat və ya 5 faiz artaraq 167 milyon 912 min manata çatıb. Bu artımda 1 milyon 385 min manat istehlak kreditlərinin, 4 milyon 364 min manat biznes kreditlərinin və 2 milyon 388 min manatı isə ipoteka kreditlərinin payına düşüb.

Bank mümkün zərərlər üçün yaradılan məqsədli ehtiyatını 194 min manat azaldaraq 21 milyon 867 min manata endirib. Buna görə də “Bank VTB”nin xalis kreditləri 8 milyon 332 min manat artaraq 146 milyon 45 min manat olub.

ƏHALİ BANKDAKI PULLARINI ÇƏKİB

“Bank VTB” fiziki şəxslərdən topladığı əmanətləri əlində tuta bilməyib. Belə ki, bankın əhalidən topladığı əmanətlər 746 min manat azalaraq 63 milyon 47 min manata düşüb. Buna baxmayaraq hüquqi şəxslərin bankdakı əmanəti 10 milyon 805 min manat artaraq 41 milyon 863 min manata çatıb. Nəticədə bankın öhdəlikləri 6 milyon 516 min manat artaraq 164 milyon 791 min manat olub.

YIĞILMIŞ ZƏRƏRDƏN QURTULA BİLMƏYİB

Səhmdar kapitalını dəyişdirməyən “Bank VTB”nin yığılmış zərəri ötən ilin sonu ilə müqayisədə 2 milyon 914 min manat azalaraq 233 milyon 919 min manata enib. Ümumi ehtiyatlarını isə 154 min manat artıran bankın cəmi kapitalı 83 milyon 288 min manata bərabərləşib. Bu isə 2022-ci liin son rübü ilə müqayisədə 3 milyon 69 min manat çoxdur.

ƏMƏLİYYAT ZƏRƏRİ ƏLDƏ EDİB

“Bank VTB”nin faiz gəlirləri onun yekunda əməliyyat zərəri əldə etməsinə səbəb olub. Belə ki, bankın faiz gəlirləri 566 min manat artaraq 6 milyon 798 min manata, faiz xərcləri isə 33 min manat azalaraq 1 milyon 733 min manata bərabər olub. Buna görə də bank 4 milyon 721 min manat xalis faiz gəliri əldə edib. Bu isə ötən ilin sonu ilə müqayisədə 389 min manat çoxdur.

Bankın qeyri-faiz gəliri 4 milyon 244 min manat azalaraq 1 milyon 147 min manata, qeyri-faiz xərcləri isə 202 min manat azalaraq 6 milyon 82 min manata düşüb. Nəticədə bankın əməliyyat zərəri 214 min manat təşkil edib. Bu da 2022-ci ilin 4-cü rübü ilə müqayisədə 3 milyon 632 min manat çoxdur.

AKTİVLƏRİNDƏN VƏ KAPİTALINDAN İSTİFADƏ EDƏ BİLMƏYİB

“Bank VTB”nin aktivlərinin gəlirliyində də ciddi azalmalar olub. Belə ki, onun sözügedən gəlirliyi 1.13 faiz azalaraq 1.17 faizə düşüb. Kapitalın gəlirliyi isə 3.35 faiz kiçilərək 3.5 faizə enib.

Qeyd edək ki, bankın məcmu kapitalı 3 milyon 130 min manat artaraq 76 milyon 724 min manata yüksəlib.