26.04.2023 Problemli Banklar

18 28

Kommersant.az “Rabitəbank”ın maliyyə hesabatına istinadən xəbər verir ki, bankın cəmi aktivləri 2022-ci ilin son rübü ilə müqayisədə 30 milyon 606 min manat və ya 3.2 faiz azalaraq 924 milyon 384 min manata düşüb. Bu azalmanın əsas səbəbi bankın ticarət və investisiya qiymətli kağızlarını 31 milyon 421 min manat və ya 26.64 faiz azaldaraq 86 milyon 498 min manata endirməsidir. Digər bir səbəb isə bankın nağd pul vəsaitləri və ekvivalentləri, o cümlədən bloklaşdırılmış nağd vəsaitləri 15 milyon 2 min manat və ya 12.26 faiz azaldaraq 107 milyon 361 min manata salmasıdır.

Bankın kredit portfelinin 22 milyon 50 min manat artması isə aktivlər cəminin azalmamasına mane ola bilməyib. “Rabitəbank” istehlak kreditlərini 9 milyon 950 min manat artıraraq 215 milyon 555 min manata, biznes kreditlərini 6 milyon 798 min manat artıraraq 312 milyon 193 min manata, ipoteka kreditlərini isə 5 milyon 311 min manat artıraraq 15 milyon 179 min manata yüksəldib. Nəticədə bankın kredit portfeli 632 milyon 927 min manata bərabər olub.

Mümkün zərərlər üçün yaradılan məqsədli ehtiyatını 3 milyon 866 min manat azaldaraq 19 milyon 984 min manata endirən “Rabitəbank”ın buna görə də xalis kreditləri 25 milyon 915 min manat artaraq 612 milyon 942 min manata çatıb.

BİZNESMENLƏR BANKDAKI PULLARINI GERİ ÇƏKİB

Hüquqi şəxslərin bankdakı əmanətləri sürətlə geri çəkirlər. Ötən ilin son rübündə də biznesmenlərin bankda yerləşdiriyi depozitlərin həcmi 179 milyon 874 min manat və ya 23.3 faiz azalmışdı. Cari ilin ilk rübündə də biznesmenlərin bankdakı əmanətlərinin 65 milyon 904 min manatını və ya 22.7 faizini geri çəkib. Buna görə də hüquqi şəxslərin bankdakı depozitləri 224 milyon 68 min manata bərabər olub. Fiziki şəxslər isə bankdakı əmanətlərinin həcmini 8 milyon 357 min manat və ya 2.6 faiz artıraraq 325 milyon 389 min manata yüksəldib. Bununla da bankın öhdəliklər cəmi ötən ilin son rübü ilə müqayisədə 26 milyon 117 min manat və ya 3 faiz azalaraq 817 milyon 277 min manata düşüb.

YIĞILMIŞ ZƏRƏRİ CƏMİ KAPİTALINI ƏRİDİB

“Rabitəbank”ın cəmi kapitalı 2022-ci ilin sonu ilə müqayisədə 4 milyon 489 min manat və ya 4 faiz azalaraq 107 milyon 107 min manata enib. Bunun səbəbi isə bankın bölüşdürülməmiş mənfəətinin yığılmş zərərlə əvəz olunmasıdır. Ötən ilin sonunda 859 min manat bölüşdürülməmiş mənfəətə sahib olan “Rabitəbank” cari ilin il rübünə 4 milyon 62 min manat yığılmış zərərlə başlayıb. Yəni bankın mənfəəti 5.7 dəfə azalaraq milyonluq zərərlə əvəz olunub.

ƏMƏLİYYAT MƏNFƏƏTİ AZALIB

Bankın faiz gəliri 4 milyon 911 min manat artaraq 20 milyon 366 min manata, faiz xərcləri isə 1 milyon 894 min manat artaraq 6 milyon 389 min manata yüksəlib. Buna görə də bank 13 milyon 978 min manat xalis faiz gəliri əldə edib. Bu isə ötən ilin sonu ilə müqayisədə 3 milyon 17 min manat çoxdur.

Qeyri-faiz gəlirini 528 min manat artıraraq 10 milyon 601 min manata, qeyri-faiz xərclərini isə 1 milyon 894 min manat artıraraq 6 milyon 389 min manata çatdırıb. Nəticədə bankın əməliyyat mənfəəti 4 milyon 969 min manata bərabər olub ki, bu da 2022-ci ilin son rübü ilə müqayisədə 730 min manat və ya 12.8 faiz azdır.

Qeyd edək ki, “Rabitəbank”ın məcmu kapitalı 4 milyon 550 min manat azalaraq 104 milyon 490 min manata düşüb.