Dövlət əmlakının özəlləşdirilməsi və icarəsi üzrə göstəricilər məlum olub

Dövlət əmlakının özəlləşdirilməsi və icarəyə verilməsi sahəsində işlər davam etdirilir.

Kommersant.az xəbər verir ki, bu barədə Əmlak Məsələləri Dövlət Xidməti məlumat yayıb.

Bildirilib ki, İqtisadiyyat Nazirliyi yanında Əmlak Məsələləri Dövlət Xidməti tərəfindən 2024-cü ilin yanvar-avqust ayları ərzində 39 hərrac keçirilib. Hərraclarda 5 səhmdar cəmiyyətinin səhm paketi, 6 kiçik dövlət müəssisəsi, 495 nəqliyyat vasitəsi satılıb. Bu ilin yanvar-avqust ayları ərzində hərraca çıxarılmış dövlət əmlakı üzrə 372 elektron sifariş qəbul edilib, hərraclarda iştirak etmək məqsədilə “Elektron Hərrac” proqram təminatı vasitəsilə 47 onlayn qoşulma reallaşıb.

Cari ilin ilk 8 ayında özəlləşdirmədən dövlət büdcəsinə 105,5 milyon manat vəsait daxil olub, ötən ilin eyni dövrü ilə müqayisədə 18,3% artım qeydə alınıb.

Əmlak Məsələləri Dövlət Xidməti tərəfindən bu ilin yanvar-avqust ayları ərzində 421-i qeyri-yaşayış, 2.338-i isə torpaq sahəsi üzrə olmaqla 2.759 yeni icarə müqaviləsi bağlanılıb.

2024-cü ilin ilk 8 ayında daşınmaz dövlət əmlakının (qeyri-yaşayış və torpaq sahələrinin) icarəsindən dövlət büdcəsinə 25,3 milyon manat vəsaitin ödənilməsi təmin olunub, ötən ilin eyni dövrü ilə müqayisədə 16% artım qeydə alınıb.

Beləliklə, 2024-cü ilin yanvar-avqust ayları ərzində dövlət əmlakının özəlləşdirilməsindən və icarəsindən büdcəyə 130,8 milyon manat vəsait daxil olub.